महोत्तरी-र-धनुषामा-सवारी-दुर्घटनामा-२-जनाको-मृत्यू

हेटौंडा, १७ साउन । मुलुकका २ जिल्लाहरुमा सवारी दुर्घटनामा परि २ जनाको ज्यान गएको छ । महोत्तरी र धनुषामा २ जनाको ज्यान गएको प्रहरी प्रधान कार्यालय नक्सालले जानकारी दिएको छ ।

महोत्तरीको बर्दिबास नगरपालिका–५ टुटेश्वर चोक स्थित महेन्द्र राजमार्गमा ना.६ ख ३७१२ नम्बरको ट्रकले सोमबार एक पैदलयात्रीलाई ठक्कर दिँदा उनको घटनास्थलमै  ज्यान गएको छ । सर्लाही सकरोल–२ बस्ने १६ वर्षीय सचिन ठाकुरलाई ठक्कर दिंदा घटनास्थलमै मृत्यु भएको हो । ट्रक र चालकलाई प्रहरीले नियन्त्रणमा लिएको प्रहरीले जानकारी दिएको छ ।

धनुषाको मिथिला नगरपालिका–४ स्थित ग.६ प १९१२ नम्बरको मोटरसाइकलले सोही ठाउँ बस्ने पैदलयात्री ६० वर्षीय रामसुन्दर महतोलाई ठक्कर दिँदा गम्भीर घाइते भएपछि उपचारको क्रममा उनको मृत्यू भएको छ । उनलाई उपचारको लागि जनकपुर अञ्चल अस्पताल पठाइएकोमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।