२ जना मृत अवस्थामा फेला, ४ जना भरुवा बन्दुक छोडेर फरार

काठमाडौं, २१ कात्तिक । कैलालीको टिकापुर नगरपालिका–४ बागमारास्थित सडक छेउको नालीमा सोही नगरपालिका–६ आम्बासा बस्ने ५० वर्षीय चक्रबहादुर रावल मंगलबार मृत अवस्थामा फेला परेका छन् । त्यस्तै बाँकेको नरैनापुर गाउँपालिका–५ महेशपुर घाट नजिकै राप्ती नदीको किनारमा एक जना मृत अवस्थामा फेला परेका छन् ।
भारत बहराइच जिल्ला नानपारा ग्राम पञ्चायत बस्ने ३२ वर्षीय साबितराम गुप्ता मृत अवस्थामा फेला परेका हुन् । आफन्त भेटन सोही गाउँपालिका–५ भगवानपुर आएका उनी कात्तिक १७ गतेदेखि हराई बेपत्ता भएका थिए । उनलाई खोजी गर्ने क्रममा सडीगलेको अबस्थामा मंगलबार उनको शव फेला परेको हो । घटनाका सम्बन्धमा स्थानीय प्रहरीबाट आवश्यक अनुसन्धान भइरहेको छ ।
सिराहाको धनगढीमाई नगरपालिका–८ मौवाडाँडा लामाटोलस्थित बिश्वनाथ साहको आँप बगैचाबाट २ नाल भरुवा बन्दुक मंगलबार प्रहरीले बरामद गरेको छ ।
ईलाका प्रहरी कार्यालय धनगढीमाईको प्रहरी गस्ती टोली उक्त स्थानमा पुग्दा ३–४ जना मानिसहरु प्रहरीलाई देख्नासाथ भागेपछि खोजी गर्नेक्रममा उक्त भरुवा बन्दुक फेला परेको हो । शंकास्पद रुपमा हिँडिरहेको १ जनालाई सोधपुछको लागि नियन्त्रणमा लिएर यस सम्बन्धमा प्रहरीले आवश्यक अनुसन्धान गरिरहेको छ ।