हतियारसहित ३ जना पक्राउ

काठमाडौँ, २२ कात्तिक । मुलुकका विभिन्न स्थानहरुमा हतियारसहित ३ जना पक्राउ परेका छन् । बाँकेको सल्यान थारमारे नगरपालिका–७ कोटबारा बस्ने २८ बर्षीय रमेश योगीलाई प्रहरीले एअर पेस्तोल १ थान र सोको गोली (छर्रा) ४५ थान सहित पक्राउ गरेको छ ।
भारतबाट नेपालतर्फ आइरहेका योगीलाई बुधबार नेपालगंज उपमहानगरपालिका–१५ जमुना चेक पोष्ट नजिक प्रहरीले चेकजाँच गर्दा उक्त पेस्तोल र गोली बरामद भएको थियो ।

खोटाङको दिप्रुङ गाउँपालिका–४ बतासे स्थित जंगलबाट प्रहरीले मंगलबार भरुवा बन्दुक १ थान र १५० ग्राम बारुद बरामद गरेको छ । प्रहरीले उक्त घटनाको अनुसन्धानको लागि सोही ठाउँ बस्ने २१ बर्षीय दिपक राई र २० बर्षीय सुमन राईलाई नियन्त्रणमा लिएको छ ।

गोरखाको भिमसेन गाउँपालिका–३ धावा चोकबाट प्रहरीले CALL 9 MM PAK लेखेको पेस्तोल १ थान र सोको म्याग्जिनमा लोड गरेको ३ राउण्ड गोली बरामद गरेको छ । आरुघाटबाट गोरखातर्फ जादै गरेको बा.७३ प ३३८६ नम्बरको मोटरसाइकललाई मंगलबार जाँच गर्न खोज्दा मोटरसाइकल चालकले साथमा रहेका झोला जंगलतर्फ फाली भागेका थिए ।

प्रहरीले झोला खोली हेर्दा उक्त पेस्तोल बरामद भएको हो । फरार व्यक्तिको प्रहरीले खोजतलास गर्नुको साथै आवश्यक अनुसन्धान गरिरहेको प्रहरी प्रधान कार्यालय नक्सालले जनाएको छ ।