घरदैलो गर्दै नयाँ शक्ति नगर र गाउँमा, राजन मैनालीलाई टोलवासीले साथ दिने

मकवानपुर , २२ कात्तिक । नयाँ शक्ति पार्टी नेपालका उम्मेदवारहरु चुनावी अभियान लिएर मकवानपुरका विभिन्न स्थानहरुमा पुगेका छन् । नयाँ शक्तिका प्रदेशसभा क्षेत्र नम्बर १ को (ख) का उम्मेदवार राजन मैनालीले आफ्नै टोलमा आज भोट माग्न पुगेका छन् ।

उनले हेटौँडा नगरपालिकाको ४ नम्बर वडास्थित प्रजातान्त्रिक टोल र एकता टोलबाट घरदैलो सुरु गरेका हुन् । महिला टोलीले नेतृत्व गरेको घरदैलोमा सम्पूर्ण कुमारी सिग्देल र रमा खरेलसहितको टोलीको सहयोग थियो । घरदैलो पश्चात एकता टोलको चोकमा कोणसभा पनि गरिएको मैनालीले जानकारी दिए ।

एकता टोलमा उम्मेदवार मैनालीको आफ्नै निवास पनि रहेको छ । उनलाई टोलवासीले समर्थन गर्ने ऐक्यबद्धत्ता जाहेर गरेको उनको भनाई छ ।
त्यस्तै नयाँ शक्तिका तर्फबाट प्रतिनिधिसभा क्षेत्र नम्बर १ का उम्मेदवार प्रल्हाद लामिछानेले पनि छतिवन, जुरेली, धियाँल लगायतका क्षेत्रमा घरदैलो गरेका छन् साथै प्रतिनिधिसभा क्षेत्र नम्बर २ का उम्मेदवार सोनाम सिं स्याङ्तान र प्रदेश सभा क्षेत्र नम्बर २ (क) को उम्मेदवार ध्रुवराज ढकाल पनि घरदैलोका लागि थाहा नगरपालिकाको पालुङ क्षेत्रमा वडा नम्बर १ २ र ३ का विभिन्न स्थानहरुमा पुगेका छन् । उनीहरुको टोलीमा ज्योति रायमाझीसहितको टोली सहभागी भएको मैनालीले जानकारी दिए ।