५ जना मृत अवस्थमा फेला

काठमाडौं, २३ कात्तिक । मुलुकका विभिन्न स्थानहरुमा ५ जना मृत अवस्थामा भेटिएका छन् । प्रहरी प्रधान कार्यालय नक्सालका अनुसार भक्तपुर, कास्की, अछाम र सोलुखुम्बुमा ती व्यक्तिहरु मृत अवस्थामा भेटिएका हुन् ।

भक्तपुरको मध्यपुर ठिमी नगरपालिका–२ दिव्यश्वरी जग्गा एकिकरण आयोजनाको प्लानिङ गरेको जग्गामा बा.१ ज १०४० नम्बरको ट्याक्सीको पछाडी सिटमा सोही ट्याक्सीका चालक मृत अवस्थामा फेला परेका छन् । ललितपुर कुसन्ती बस्ने सर्लाही धुर्कोलीका ४९ वर्षीय यज्ञबहादुर खड्का बुधबार मृत अवस्थामा फेला परेका हुन् ।

कास्कीको लेखनाथ महानगरपालिका–९ पृथ्वीचोकस्थित पृथ्वी बसपार्कभित्र रहेको टोल बिकास समितिको कार्यालयको पेटीमा बुधबार एक जना मृत अवस्थामा फेला परेका छन् । मृत अवस्थामा फेला परेका व्यक्ति सोही क्षेत्रमा मागी खाई हिँड्ने गरेका हाल नाम, थर, वतन नखुलेका करीव ६० वर्षीय पुरुष रहेको बताइएको छ ।

अछाममने कमलबजार नगरपालिका–३ बस्ने २१ वर्षीया पार्बती रावल र उनकै २ बर्षीय छोरा मिलन थापा कर्णाली नदीको किनारमा बुधबार मृत अवस्थामा फेला परेका छन् ।

उनीहरु दुबै कात्तिक १४ गते घरबाट हराई बेपत्ता भएका थिए । खोजी गर्ने क्रममा तुर्माखाद गाउँपालिका–६ स्थित कर्णाली नदीको किनारमा बुधबार दुबैजना मृत अबस्थामा फेला परेको प्रहरीले जनाएको छ ।

सोलुखुम्बुको दुधकौशिका गाउँपालिका–२ स्थित नबराज कार्कीको घरमा बसेर जग्गाजमिन कमाई खाने गरेका सोलुखुम्बुको काकू घर बताउने एक जना व्यक्ति मृत अवस्थामा फेला परेका छन् । हाल नाम, थर, वतन नखुलेका करीव ६० वर्षीय पुरुष सोही घर नजिकै बारीमा बुधबार मृत अवस्थामा फेला परेका हुन् । घटनाका सम्बन्धमा स्थानीय प्रहरीबाट आवश्यक अनुसन्धान भइरहेको छ ।