सवारी दुर्घटनामा ५ जनाको मृत्यू

काठमाडौं, २३ कात्तिक । मुलुकका छुट्टा–छुट्टै स्थानमा बुधबार भएको सवारी दुर्घटनामा परि ५ जनाको ज्यान गएको छ । प्रहरी प्रधान कार्यालय नक्सालका अनुसार नवलपरासी, काभ्रेपलाञ्चोक, रुपन्देही र सुनसरीमा ती व्यक्तिहरुको ज्यान गएको हो ।

नवलपरासीको सुनवल नगरपालिका–१३ सूर्यबस्तीस्थित सडकमा बा.१० च ६२९८ नम्बरको कार बुधबार अनियन्त्रित भई रुखमा ठोक्किएर दुर्घटना हुँदा एक जनाको ज्यान गएको छ । दुर्घटनामा परि गम्भीर घाइते भएका सुनवल नगरपालिका–१२ भुमही बस्ने २७ वर्षीय मदन पौडेलको लुम्बिनी अंञ्चल अस्पताल बुटवलमा उपचारको क्रममा मृत्यु भएको हो ।

काभ्रेपलाञ्चोकको पाँचखाल नगरपालिका–९ तामाघाट बजारस्थित अरनिको राजमार्गमा बा.४ ख ३२६८ नम्बरको ट्रिफरले बुधबार ठक्कर दिँदा एक बालकको ज्यान गएको छ । दुर्घटनामा सोही ठाउँ बस्ने गोपाल कुवरको छोरा ४ वर्षीय रामकुमार कुवरको घटनास्थलमै मृत्यु भएको हो । ट्रिपरका चालकलाई प्रहरीले नियन्त्रणमा लिएको छ ।

तस्बिर–गुगल

रुपन्देहीको देवदह–९ बुद्धचोकस्थित महेन्द्र राजमार्गमा ना.२ ख १८५४ नम्बरको ट्रिप्परले बुधबार ठक्कर दिँदा एक जनाको ज्यान गएको छ । ठक्करपछि गम्भीर घाइते भएका पैदलयात्री हाल नाम, थर, वतन नखुलेका करीव ३५ वर्षीय पुरुषको मेडिकल कलेज देवदहमा उपचारको क्रममा मृत्यु भएको हो । ट्रिफर र चालकलाई प्रहरीले नियन्त्रणमा लिएको छ ।

सुनसरीको गढी गाउँपालिका–२ कलरूवास्थित थलाह खोलामा मे.१ त २४७७ नम्बरको ट्याक्टर बुधबार अनियन्त्रीत भई खोलामा पल्टिएर दुर्घटना हुँदा एक जनाको ज्यान गएको छ ।

ट्याक्टरले थिचेर सोही ट्याक्टरका चालक सोही नगरपालिका–२ बस्ने १६ वर्षीय कमल ऋषिदेबको घटनास्थलमै मृत्यु भएको प्रहरीले जनाएको छ । दुर्घटनाका सम्बन्धमा स्थानीय प्रहरीबाट आवश्यक अनुसन्धान भइरहेको छ ।