‘पैसाले भोट किन्छु भन्नेलाई मत नदिन आग्रह’

मकवानपुर, १८ मंसिर । प्रतिनिधिसभा क्षेत्र नम्बर २ का वाम गठबन्धन उम्मेदवार बिरोध खतिवडाले पैसाले भोट किन्छु भन्दै मतदाताको अपमान गर्ने उम्मेदवारहरु विश्वाश नगर्न आग्रह गरेका छन् ।

उनले लोकतान्त्रिक गठबन्धनका उम्मेदवारहरुले पैसाको प्रलोभनमा मतदातालाई आकर्षित बनाउने खेलमा रहेको आरोप लगाउँदै त्यस्ता उम्मेदवारलाई मत नहाल्न आग्रह गरेका हुन् । मनहरी गाउँपालिका वडा नम्बर ३, ४ र ५ नम्बर वडामा भएको चुनावी सभालाई सम्बोधन गर्दै खतिवडाले देश बामशक्तिमय हुँदै गएको समयमा विभिन्न प्रलोभनबाट मतदाताहरुमा भ्रम सिर्जना गर्ने बिरुद्ध उत्रनसमेत आग्रह गरे ।

त्यस्तै प्रदेशसभा उम्मेदवार राजाराम स्याङ्तानले काँग्रेसको सरकारले देशको विकास नगरेको आरोप लगाए । देशमा बामपन्थीको सरकार आएपछि मात्रै देशले गति लिन थालेको उनको भनाई थियो । कम्युनिष्ट शासन पश्चात देशका हरेक जनताले स्थानीय तहबाटै आफ्नो आवश्यकता प्राप्त गर्न सक्ने अबस्था आउने भएकोले दुईतिहाई बहुमतसहीत बाम गठबन्धनलाई बिजयी गराउन आवश्यक रहेको उनले बताए ।