निर्वाचनका समयमा व्यक्त प्रतिबद्धता पुरा गर्ने प्रचण्डको उद्घोष

चितवन, २५ मंसिर । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले वाम गठबन्धनले निर्वाचनका समयमा व्यक्त गरेका प्रतिबद्धता इमान्दारीपूर्वक पूरा गर्ने बताउनुभएको छ ।

मुख्य निर्वाचन अधिकृतको कार्यालयले आज भरतपुरमा आयोजना गरेको प्रमाणपत्र वितरण समारोहमा उहाँले राष्ट्रियता, राष्ट्रिय एकता, स्वाधीनताका लागि समर्पित भई अगाडि बढ्ने बताउनुभयो ।

अध्यक्ष दाहालले जनताले राजनीतिक परिवर्तनका लागि ठूलो भूमिका खेलेको उल्लेख गर्दै समाजवादको आधारशीला तयार पारी आर्थिक क्रान्तिमा लाग्ने अबको हाम्रो अभियानमा पनि जनतालाई सहयोग गर्न आग्रह गर्नुभयो ।

स्वदेश तथा विदेशमा रहनु भएका आम नेपालीलाई निर्वाचनमा गरेको सहयोगप्रति धन्यवाद व्यक्त गर्दै उहाँले भन्नुभयो, “वाम गठबन्धन बनाएर स्थायित्व, समृद्धिको नारासहित जनतासामु प्रस्तुत भयौँ, यसलाई पूरा गर्नेछौँ, ।”

अध्यक्ष दाहालले नेपाल राजनीतिक अस्थिरता र अराजकताको युगबाट राजनीतिक स्थायित्व, विकास र समृद्धिको नयाँ युगतर्फ प्रवेश गरेको बताउँदै “नेपाल इतिहासको नयाँ युगतिर प्रवेश गर्ने कुराको शुरुवात भएको छ” भन्नुभयो ।

सो अवसरमा चितवन क्षेत्र नं ३ का निर्वाचन अधिकृत शम्भुराज रेग्मीले अध्यक्ष दाहाल र प्रदेशसभामा निर्वाचित कृष्णप्रसाद भूर्तेल र रामलाल महतोलाई प्रमाणपत्र वितरण गर्नुभएको थियो भने मुख्य निर्वाचन अधिकृत कुलप्रसाद शर्माले क्षेत्र नं २ का कृष्णभक्त पोखरेल र प्रदेशसभाका घनश्याम दाहाल र विजय सुवेदीलाई प्रमाणपत्र वितरण गर्नुभएको थियो ।

त्यसैगरी क्षेत्र नं १ का निर्वाचन अधिकृत परमेश्वर पराजुलीले प्रतिनिधिसभाका सुरेन्द्र पाण्डे र प्रदेशसभाका दावा दोर्जे लामा र कृष्ण खनाललाई प्रमाणपत्र वितरण गर्नुभएको थियो । उक्त कार्यक्रममा वन तथा भूसंरक्षण मन्त्री एवं दाहालका निकटतम प्रतिस्पर्धी बिक्रम पाण्डेले विजयी दाहाललाई बधाई तथा शुभकामना व्यक्त गर्नुभएको थियो । -(रासस)