राईगाउँ पुगेर शहिद गेटमा दिप प्रज्वलन

मकवानपुर, २९ मंसिर । वाम गठबन्धनका विजयी उम्मेदवारहरुले पूर्वी मकवानपुरको राईगाउँस्थित शहिद गेटमा दिप प्रज्वलन गरेका छन् । शहिदहरुको सम्मानमा मकवानपुर १ प्रतिनिधिसभा सदस्य कृष्ण दाहाल र मकवानपुर १(क) का प्रदेश सभा सदस्य प्रेम बहादुर पुलामीले मैन बत्ती बालेर दिप प्रज्वलन गरेका हुन् ।

उक्त गेट माओवादी सशस्त्र युद्धमा मारिएका माओवादी सेनाहरुको सम्झनामा निर्माण गरिएको हो । दिप प्रज्वलनपछि र्याली सहित राईगाउँ बजारमा कोणसभा गरिएको थियो । सभामा बोल्दै प्रतिनिधिसभा सदस्य दाहालले यस क्षेत्रका जनताले पाँच वर्षभित्रमा नै विकास र सुशसानको अनुभूति गर्न पाउने बताए । प्रदेशसभा सदस्य प्रेम बहादुर पुलामीले जनतासँग चुनावअघि गरेका प्रतिबद्धताहरु पुरा गरिने बताए ।

सभामा बाग्मती गाउँपालिका अध्यक्ष सर्केश घलान,नेकपा माओवादी केन्द्रका नेता कमान सिं पाख्रिन लगायतको आतिथ्यता रहेको थियो । विजयपछि हटियाबाट सुरु भएको बिजय उत्सव हर्नामाडी, छतिवन, फापरबारी र ठिंगनमा पनि सपन्न भएको छ ।