सवारी दुर्घटनामा ३ जनाको मृत्यू

काठमाडौं, ५ चैत । मुलुकका विभिन्न स्थानहरुमा भएको सवारी दुर्घटनामा परि ३ जनाको ज्यान गएको छ । प्रहरी प्रधान कार्यालय नक्सालका अनुसार सोलुखुम्बु, मोरङ र कैलालीमा ती व्यक्तिहरुको ज्यान गएको हो ।

सोलुखुम्बुको थुलुङ दुधकोशी गाउँपालिका–२ नागपोखरीमा को.२त ४६१८ नम्बरकोे ट्याक्टर आइतबार पल्टेर दुर्घटना हुदाँ ट्याक्टरमा सवार तिनखोरीया बस्ने ६९ वर्षीय पूर्णबहादुर बस्नेतको मृत्यु भएको छ । ट्याक्टर चालकलाई प्रहरीले नियन्त्रणमा लिएको छ ।

मोरङको सुन्दरहरैचा नगरपालिका–२ लबतोरिया बस्ने ४२ वर्षीय छुतहरु सरदारले आइतबार आफ्नै घरको आँगनमा को.१ त ७६७६ नम्बरको ट्याक्टर पार्किङ गरी राख्ने क्रममा ट्याक्टर पल्टिएर थिच्दा घटनास्थलमै मृत्यु भएको छ ।

कैलालीको गोदावरी नगरपालिका–९ स्थित पूर्वपश्चिम राजमार्गमा से.६प ४७२१ नम्बरको मोटरसाइकल अनियन्त्रित भई दुर्घटना हुँदा चालक सोही ठाउँ बस्ने ४० वर्षीय रमेश चौधरी गम्भीर घाइते भएकाले उपचारको लागि सेती अञ्चल अस्पताल धनगढी पठाइएकोमा उपचारको क्रममा आइतबार मृत्यु भएको छ । दुर्घटनाका सम्बन्धमा स्थानीय प्रहरीले आवश्यक आनुसन्धान गरिरहेको छ ।