नक्कली सुनसहित हेटौँडाबाट दुई जना पक्राउ

मकवानपुर, २९ कात्तिक । मकवानपुरको हेटौँडा उपमहानगरपालिका वडा नं. १ चौकीटोलबाट कात्तिक २८ गते बिहिबार मकवानपुर प्रहरीले नक्कली सुनसहित दुई जनालाई नियन्त्रणमा लिई आज (शुक्रबार) सार्वजनिक गरिएको छ ।

प्रहरीले नक्कली सुनसहित दोलखा जिरी नगरपालिका ३ बस्ने ४७ बर्षीय ध्याल सिंह शेर्पा र मोटरसाइकलमा सवार मकवानपुरको राक्सिराङ् गाउँपालिका–४ बस्ने अभय कुमार थिङ लाई नियन्त्रणमा लिएको हो ।

उनीहरुको साथबाट सुइसी १ किलो फइन गोल्ड ९९९.९ सि ओ २२६६६५० लेखिएको सुन जस्तो देखिने पहेलो रङ्गको चारपाटे आकारको नक्कली सुन बरामद गरेको जिल्ला प्रहरी कार्यालय मकवानपुरले जनाएको छ ।

उनीहरुलाई जिल्ला प्रहरी कार्यालय मकवानपुरबाट खटिएको प्रहरी टोलीले भैसेबाट हेटौंडातर्फ आउदै गरेको बा ९३ प ९०६ नम्बरको मोटरसाइकल चेकजाँच गर्ने क्रममा उक्त नक्कली सुन फेला पारी नियन्त्रणमा लिएको हो ।

पक्राउ परेका दुबैजनालाई ठगि मुद्दामा आवश्यक अनुसन्धान भइरहेको जनाइएको छ।