सत्तापक्षले चिटिङ गर्यो, लाजमर्दो काम भयो : प्रदेशसभा सदस्य पौडेल

मकवानपुर । प्रदेशसभा सदस्य रमेश पौडेलले बिनियोजित बजेट टेबुल गरिसकेपछि पनि त्यसको प्रति प्रदेश सदस्यहरुको हातमा नपरेकोमा आपत्ति जनाएका छन् ।

तु खबर डटकमसँग कुरा गर्दै प्रदेशसभा सदस्य पौडेलले सत्तापक्षले चिटिङ गरेको आरोपसमेत लगाए ।

बिनियोजित बजेट टेबुल भएपछि सभामुख सानुकुमार श्रेष्ठ कहाँ गएर यसबारे जिज्ञासा पनि राखिएको र उनले पनि बिनियोजित बजेटको प्रति (किताब) आइसकेको जानकारी दिएको भएपनि सभामा सदस्यहरुलाई उपलब्ध गराइएन ।

पौडेलका अनुसार, सो बजेट किताब चितवनमा छपाइको काम भइरहेको भन्दै प्रदेशसभा सदस्यहरुलाई आज उपलब्ध नगराइएको हो ।

कुनै पनि विधयक टेबुल हुने वित्तिकै सदस्यहरुको पिजन होलमा राखिदिनुपर्नेमा त्यसो नगरी बजेटमाथिको छलफल प्रारम्भ हुनु दुखद् भएको पौडेलले बताए ।

यो संसदको मर्यादा बिपरित काम भएको छ, यसमा अर्थमन्त्री र सम्बन्धित मन्त्रालय जिम्मेवार हुनुपर्छ, उनले भने ।