मकवानपुरका थिङ महोत्तरीबाट पक्राउ

महोत्तरी । महोत्तरी प्रहरीले अवैध लागूऔषध गाँजा र नगदसहित मकवानपुरका एक युवकलाई पक्राउ गरेको छ । पक्राउ पर्नेमा मकवानपुरको भीमफेदी गाउँपालिका वडा नम्बर २ बस्ने ३० वर्षीय अमरकुमार थिङ रहेका छन् ।

उनलाई एकडारा गाउँपालिका भटौलिया नजिक सडकबाट १ सय १० किलो अवैध लागूऔषध गाँजा र नगद ८ हजार १ सय ५० रुपैयाँसहित बुधबार राति प्रहरीले पक्राउ गरेको हो ।

सशस्त्र प्रहरी बल नेपालको चेक प्वाईन्ट एकडारा र सिमा प्रहरी चौकी कटिकटैयाबाट खटिएको संयुक्त प्रहरी टोलीले ना ३ च ९६२४ नम्बरको गाडी जाँच गर्ने क्रममा गाडीबाट सो परिणामको लागूऔषध बरामद भएपछि थिङलाई पक्राउ गरेको प्रहरीले जनाएको छ ।

पक्राउ परेका थिङमाथि आवश्यक अनुसन्धानका साथै कानूनी काबारही अगाडि बढाइएको जनाएको छ ।