माघ १ गतेदेखि हेटौंडाको सिनेमा हल खुल्ने

मकवानपुर । कोरोना भाइरस (कोभिड–१९) संक्रमण जोखिमको कारण देशव्यापी रुपमा गरिएको लकडाउनसँगै बन्द भएका हेटौंडाका दुई वटा सिनेमा हल माघ १ गतेबाट पूर्ण रुपमा संचालनमा आउने भएका छन् ।

गत पुस १० गतेबाट संचालनमा आएको ओम्याक्स सिनेमा हल दर्शकहरुको उपस्थिति नभएपछि पुनः बन्द भएको थियो । दर्शकको उपस्थिति न्युन भएपछि खुलेको हल पनि पुनः बन्द गरिएको ओक्याक्स सिनेमा हलका लेखापालन दिनेश तिमल्सिनाले बताए ।

ओम्याक्स सिनेमा हलमा पहिला नै रिलिज भइसकेको नेपाली चलचित्र ‘सेन्टी भाइरस’ र ‘आमा’ प्रदर्शन गरिएको थियो । उक्त सिनेमा हलले आगामी माघ १ गतेबाट पनि सोही चलचित्र प्रदर्शन गर्ने भएको छ ।

यस्तै, नारायणी मलमा रहेको एनएस सिनेमा हलले पनि माघ १ गतेबाट नेपाली चलचित्र ‘एउटा यस्तो प्रमे कहानी’ प्रदर्शन गर्ने एनएस सिनेमाका अपरेटर किशोर पौडेलले जानकारी दिए । उक्त चलचित्र माघ १ गतेदेखि देशभर प्रदर्शन हुँदैछ ।