संसद् विघटनविरुद्ध संयुक्त आन्दोलन गर्ने विषयमा देउवासंग कुराकानी गरेको छु – प्रचण्ड

मकवानपुर । नेपाल कम्युनिष्ट पार्टी नेकपाका कार्यकारी अध्यक्ष पुष्पकमल दाहाल प्रचण्डले केही समयभित्रै नेपाली कांग्रेस र जनता समाजवादी पार्टीलगायतका दलसंग समन्वय गर्दै संयुक्त आन्दोलनमा जाने तयारी भइरहेको बताएका छन् ।

आज बिहान चितवनमा पत्रकारहरूसँग कुराकानी गर्दै प्रचण्डले नेपाली कांग्रेसका सभापति शेरबहादुर देउवा र जनता समाजवादी पार्टीका नेताहरूसँग संयुक्त आन्दोलनमा जानेबारे छलफल भएको बताए ।

‘आन्दोलन भइराखेको छ। यसलाई सकेसम्म संयुक्त गरौं भन्ने प्रयास भइराखेकै छ। हिजो मैले शेरबहादुर देउवासँग कुरा गरेँ यसलाई संयुक्त बनाऔं भनेर। रामचन्द्र पौडेल र अरू नेतासँग पनि कुरा गरिराखेकै छु। जसपाका नेताहरूसँग पनि कुरा भइराखेकै छ। केही समयभित्र संयुक्त आन्दोलन हुन्छ भन्ने लागेको छ,’ उनले भने।

संविधानलाई सही मार्गमा ल्याउन आन्दोलन गर्नुपरेको उनले बताए।