मानव बेचबिखन मुद्दाका फरार एक अभियुक्त पक्राउ

वीरगञ्ज । बारा प्रहरीले मानव बेचबिखन मुद्दाका फरार एक अभियुक्तलाई पक्राउ गरेको छ । प्रहरीले बाराको साविक नरही गाविस–९ बेलाही टोल बस्ने जगदिश दासलाई पक्राउ गरेको हो । उनलाई प्रहरीले १४ वर्षपछि बाराको करैयामाई गाउँपालिका वडा नं. ८ बाट पक्राउ गरेको हो ।

प्रहरीका अनुसार, ०६३ मंसिर २१ गते साँझ ७ बजे काठमाडौंबाट आएको बा २ ख ६४१ नम्बरको बसलाई करैया पुलमा दास सहितका ४ जना व्यक्तिहरुले कटुवा बन्दुक देखाई रोकेका थिए । उनीहरुले बसका धनी खोटाङको साविक दिक्तेल गाविस–२ घर भई भक्तपुरको मध्यपुर थिमि नगरपालिका–१५ बस्ने ताराकुमार खत्रीलाई नियन्त्रणमा लिएर नगद, मोबाइल र घडी लुटपाट गरेका थिए ।

खत्रीलाई दासको घरमा बन्धक बनाइ उनीहरुले फिरौती मागेका थिए । फिरौती रकम नदिए भारतमा लगेर बेच्ने धम्की दिएको भन्दै दाससहित ४ जनाविरुद्ध खत्रीले जिल्ला प्रहरी कार्यालय बारामा उजुरी दिएका थिए ।

पक्राउ परेका उनलाई आवश्यक अनुसन्धान सुरु गरिएको बारा प्रहरीले जनाएको छ ।