बुद्धचोक हत्या: एक युवक पक्राउ

बारा । बारा प्रहरीले धारिलो हतियार प्रहार गरी हत्या गरेको आरोपमा एक जनालाई पक्राउ गरेको छ । प्रहरीले निजगढ नगरपालिका वडा नं.९ का अन्दाजी १८ वर्षीय युवक काले भनिने रोहित शर्माको हत्या गरेको आरोपमा एक युवकलाई पक्राउ गरेको हो ।

पक्राउ पर्नेमा रौतहटको चन्द्रपुर नगरपालिका वडा नम्बर ४ का अरुणकुमार साह रहेका छन् । रोहित शर्मा र अरुणकुमार साह साथी हुन् ।

प्रहरीका अनुसार, रोहित शर्माको मंगलबार बिहान करिब ४ बजेर ४० मिनेटको समयमा निजगढ–९ स्थित आफ्नै घरमा धारिलो हतियार प्रहार गरी हत्या गरेको अवस्थामा शव फेला परेको थियो ।

आरोपित साहले आफ्नो अपराध समेत स्वीकारी सकेका छन्। साहले उनीहरुबीच पहिलेदेखि नै रिसिइबी र लागूऔषध सेवन गर्दा पटक/पटक झगडा हुँदै आएको र मृतक शर्माले आफूलाई सधैं अपमानित गर्दै ‘पेस्तोलले गोली ठोकेर मारिदिन्छु’ भन्दै धाकधम्की देखाउँदै आएकोले आफूले उनको हत्या गरेको अरुणले प्रहरीमा बयान दिएका छन्।

मृतक शर्मा पेन्ट्ससम्बन्धी काम गर्दै आएका थिए।

पक्राउ परेका साहमाथि आवश्यक अनुसन्धानका साथै कानूनी कारबाही अगाडि बढाइएको जनाएको छ ।