निषेधाज्ञा उल्लङ्घन गर्ने १३१ वटा सवारीसाधन मकवानपुर प्रहरीको नियन्त्रणमा

मकवानपुर । मकवानपुर प्रहरीले निषेधाज्ञा उल्लङ्घन गर्ने १३१ वटा सवारीसाधनलाई नियन्त्रणमा लिएको छ ।

प्रहरीले सोमबार जिल्ला प्रशासन कार्यालय मकवानपुरले कोरोना भाइरस (कोभिड–१९) संक्रमणको रोकथाम तथा नियन्त्रणलाई मध्येनजर गर्दै जारी गरेको निषेधाज्ञा उल्लंघन गर्ने १३१ वटा विभिन्न सवारीसाधनलाई नियन्त्रणमा लिएको हो ।

प्रहरीले निषेधाज्ञा उल्लङ्घन गर्ने मोटरसाइकल/स्कुटर ६६ वटा, अटो ४६ वटा, सानो गाडी ५ वटा र बस १४ वटा गरी जम्मा १३१ वटा सवारीसाधनलाई नियन्त्रणमा लिएको जिल्ला प्रहरी कार्यालय मकवानपुरले जनाएको छ ।

उनीहरुलाई मातहत कार्यालयबाट प्रहरी उपरीक्षक समेतको चेकिङ टोलिले मकवानपुरको विभिन्न स्थानमा राखेको चेकप्वाईन्टबाट नियन्त्रणमा लिएको हो ।

साथै प्रहरीले सवारी साधनहरुको कागजपत्र र अटेर गरी पसल संचालन गर्ने १५ जना व्यक्तिलाई नियन्त्रणमा लिई संक्रामक रोग ऐन २०२० बमोजिम आवश्यनक कारवाहीको लागी जिल्ला प्रशासन कार्यालय मकवानपुरमा पठाईएको जिल्ला प्रहरी कार्यालय मकवानपुरका प्रहरी नायब उपरीक्षक जयश्वर रिमालले जानकारी दिए ।