गृह मन्त्रालयद्वारा सीडीओहरुको सरुवा

काठमाडौँ । गएको असोज ३१ गतेको मन्त्रीस्तरीय निर्णय अनुसार गृह मन्त्रालयले प्रमुख जिल्ला अधिकारी (सीडीओ) को काज सरुवा गरेको छ । कैलालीका प्रमुख जिल्ला अधिकारी खगेन्द्रप्रसाद रिजाललाई गृह मन्त्रालयमा तानेर उनको स्थानमा सहसचिव किरण थापालाई पठाइएको छ । त्यसैगरी सहसचिव जगन्नाथ पन्तलाई पाल्पाको सीडीओको जिम्मेवारी दिएर सरुवा गरिएको छ ।

यसअघि पाल्पाका प्रमुख जिल्ला अधिकारी रहेका योगेन्द्रप्रसाद पाण्डेको दशैं अगाडि अख्तियार दुरुपयोग अनुसन्धान आयोगमा सरुवा भएको थियो । गृह मन्त्रालयका सहसचिव हरिप्रसाद घिमिरेलाई भने अर्घाखाँची सरुवा गरिएको छ । अर्घाखाँचीका प्रजिअ विष्णु पौडेललाई गृह मन्त्रालयमा तानिएको छ ।

राष्ट्रिय विपद जोखिम न्यूनीकरण तथा व्यवस्थापन प्राधिकरणमा उपसचिव पदमा कार्यरत वेदनिधि खनाललाई सिन्धुपाल्चोकको प्रमुख जिल्ला अधिकारीको जिम्मेवारी दिएर सरुवा गरिएको छ । स्याङ्जाका प्रमुख जिल्ला अधिकारी दीपकराज नेपाललाई गृह मन्त्रालय तानिएको छ । उनको ठाउँमा उप–सचिव राजुप्रसाद पौडेललाई प्रमुख जिल्ला अधिकारीको रुपमा सरुवा गरिएको हो ।