भारतीय गाडीको ठक्करबाट २ जनाको मृत्यु

वीरगञ्ज । बारामा भारतीय नम्बरको गाडीको ठक्करबाट दुई जनाको मृत्यु भएको छ । गएराति कलैया–वीरगञ्ज सडकखण्डको कलैया–५ स्थित विजय आयल स्टोर अगाडि कलैयाबाट वीरगञ्ज जाँदै गरेको बीआर ०५ एआर ५१५१ नम्बरको स्कारपियो गाडीले विपरीत दिशाबाट आउँदै गरेको ना ८ प ८८६३ नम्बरको मोटरसाइकललाई ठक्कर दिँदा दुई जनाको मृत्यु भएको हो ।

मृत्यु हुनेमा बाराको कलैया उपमहानगरपालिका–५ बस्ने ४० वर्षीय नरेश साह र ५५ वर्षीय शितल साह रहेको प्रहरीले जनाएको छ । दुर्घटनामा परेर गम्भीर घाइते उनीहरुलाई उपचारको लागि नारायणी अस्पताल वीरगञ्जमा लगिएकोमा थप उपचारको लागि नेशनल मेडिकल लगिएको थियो । नेशनल मेडिकल कलेजमा उपचारको क्रममा राति साढे १० बजे चिकित्सकले दुवै जनालाई मृत घोषित गरेको जिल्ला प्रहरी कार्यालय बाराले जनाएको छ । फरार स्कारपियो चालकको खोजी भइरहेको जिल्ला प्रहरी कार्यालय बाराले जनाएको छ ।