मकवानपुरगढी : वडा अध्यक्ष उम्मेदवार रुम्बाद्वारा प्रतिबद्धता पत्र सार्वजनिक

मकवानपुर । मकवानपुरगढी गाउँपालिका वडा नम्वर ७ का वडा अध्यक्ष उम्मेदवार सुर्यबहादुर रुम्बाले यही बैशाख ३० गते हुने स्थानीय तह निर्वाचनलाई लक्षित गर्दै प्रतिवद्धता पत्र सार्वजानिक गरेका छन् । वडा अध्यक्ष उम्मेदवार रुम्बाले विकासका पूर्वाधार, स्वास्थ्य, शिक्षा, रोजगार तथा कृषि क्षेत्रलाई प्राथमिकतामा राखी शनिबार प्रतिबद्धता पत्र सार्वजनिक गरेका हुन् ।

सत्तारुढ गठबन्धनको तर्फबाट वडाध्यक्ष उम्मेदवार बनेका रुम्बाले सुकौरा खोलामा पक्की पुलसहित सडक सञ्जाल विस्तार तथा फराकिलो बनाउने, खानीको जोखिम रहेको स्थानमा मेसिनरी वालसहित तटबन्धन, विद्युत विस्तार, खानेपानीको व्यवस्था लगायत विभिन्न भौतिक पूर्वाधारहरुको कार्यक्रम ल्याइने बताएका छन् ।

उनले बालमैत्री स्थानीय शासनलाई पालना गरी स्वास्थ्य, शिक्षामा निःशुल्क गरिने, आर्थिक विपन्न भएकोलाई रोजगारी व्यवस्था गरिनुका साथै कृषि क्षेत्रलाई आधुनिकिकरण गरी ‘एक घर, एक टनेल’ निर्माण गने प्रतिबद्धता व्यक्त गरेका छन् । रुम्बा यसअघि २०७४ सालको निर्वाचनमा नेपाली कांग्रेसबाट निर्वाचित भएका थिए । उनले यसअघि पूरा हुन नसकेका अधुरो कामहरुलाई पूर्णता दिन आफ्नो उम्मेदवारी फेरी रहेको बताए ।