राष्ट्रिय परिचयपत्र छाप्न सुरु

काठमाडौं । राष्ट्रिय परिचयपत्र तथा पञ्जीकरण विभागले राष्ट्रिय परिचयपत्र छाप्न सुरु गरेको छ । गृहसचिव टेकनारायण पाण्डेले सिंहदरबारस्थित विभागको कार्यालयमा परिचयपत्र छपाइ कार्यक्रमको शुभारम्भ गरेका हुन् ।

फ्रान्सको आइडिमिया सेक्युरिटी एण्ड आइडेन्टीटी कम्पनीबाट परिचयपत्रका लागि आवश्यक कार्ड ल्याएपछि सोमबारबाट छपाइ सुरु गरिएको विभागका महानिर्देशक तिर्थप्रसाद भट्टराईले जानकारी दिए ।

विभागमा ३१ लाख ४७ हजार कार्ड आइपुगेको छ । ८ लाख कार्ड आउने प्रक्रियामा रहेको महानिर्देशक भट्टराईले जानकारी दिए । विभागका अनुसार यसवर्ष ५० लाख कार्ड आपूर्ति गर्ने लक्ष्य राखिएको छ । मेसिनले घण्टामा ११ सयवटा कार्ड प्रिन्ट गर्छ । विभागले राष्ट्रिय परिचयपत्रका लागि आवेदन संकलन गरिरहेको छ ।