मकवानपुर प्रहरीद्वारा ४ सय २२ किलो गाँजा र मिनि ट्रक बरामद

मकवानपुर । मकवानपुर प्रहरीले लागूऔषध गाँजा र मिनि ट्रक बरामद गरेको छ । प्रहरीले सोमबार साँझ थाहा नगरपालिका वडा नम्वर ३ बायोखोलास्थित डाँडाबास–पालुङ सडकको छेउबाट ४ सय २२ किलो गाँजा र मिनि ट्रक बरामद गरेको जिल्ला प्रहरी कार्यालय मकवानपुरले जनाएको छ ।

उक्त लागूऔषध विशेष सूचनाको आधार पुगेको ईलाका प्रहरी कार्यालय पालुङबाट खटिएको प्रहरी टोलीले बरामद गरेको जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीले जानकारी दिए ।

सोमबार साँझ सवारीसाधन चेकजाँज गर्ने क्रममा सडकको छेउमा बेवारिसे अवस्थामा रोकी राखेको ना. ६ ख. ३२४३ नम्वरको महेन्द्रा कम्पनीको मिनि ट्रकलाई शंका लागि चेकजाँच गर्दा ट्रकको पछाडी सामान लोड गर्ने भागमा सेतो रङ्गको १४ वटा बोराहरु भित्र टेपले बेरी प्लाष्टिकको डोरीले बाधिएको २८ प्याकेटमा उक्त परिमाण गाँजा बरामद भएको प्रहरी नायव उपरीक्षक कार्कीले बताए । प्रहरीले उक्त कार्यमा संलग्न व्यक्तिहरुको खोजतलास गरिरहेको जनाइएको छ ।