टेक्सासमा लरीभित्र ४० जनाको शव फेला

काठमाडौं । अमेरिकाको टेक्सासमा एक ठूलो ट्रक (लरी) भित्र कम्तिमा ४० जनाको शव फेला परेको छ । टेक्सासको सान एन्टोनियो भन्ने स्थानको दक्षिण पश्चिम क्षेत्रको रेलको लिक नजिक ४० जना आप्रावासीको शव फेला परेको बीबीसीले जनाएको छ ।

स्थानीय एक टेलिभिजन च्यानलका अनुसार, लरी भित्र फेला परेकामध्ये १६ जनाको शवलाई विभिन्न अस्पतालमा लगिएको छ ।उनीहरु कुन देशका नागरिक हुन् र उनीहरुको मृत्यु कसरी भयो भन्ने एकीन भएको छैन ।

सामाजिक सन्जालमा शेयर गरिएको घटनास्थलको तस्वीरमा प्रहरीसहित लरी वरपर आपतकालीन सेवाका सदस्यहरु देखिन्छन् । सो लरीका चालक फेला परेका छैन् । न्यूयोर्क टाइम्सका अनुसार प्रहरीले चालकको खोजी गरिरहेको छ । उक्त घटनाको बारेमा विस्तृत विवरण आउन बाँकी छ ।