हेटौंडाका ५ जना प्रहरीको फन्दामा

मकवानपुर । मकवानपुर प्रहरीले हेटौंडा उपमहानगरपालिकाको छुट्टाछुट्टै स्थानबाट लागूऔषधसहित पाँच जनालाई पक्राउ गरेको छ । प्रहरीले हेटौंडा उपमहानगरपालिका वडा नम्वर १६ हटियाबाट ५ किलो ४०० ग्राम लागूऔषध खैरोहेरोईनसहित दुई जनालाई पक्राउ गरेको छ । पक्राउ पर्नेमा ३९ वर्षीय सुवास लामिछाने र हेटौंडा–७ बस्ने २८ वर्षीय बिकेश गौतम रहेका छन् ।

त्यस्तै, हेटौंडा उपमहानगरपालिका वडा नम्वर १२ नयाँ पुलस्थित भित्री बाटोबाट विभिन्न प्रकारको लागूऔषधसहित दुई जनालाई पक्राउ गरेको छ । पक्राउ पर्नेहरुमा सोही वडामा बस्ने २७ वर्षीय रमेश बिश्वकर्मा र २७ वर्षीय सजन बिश्वकर्मा रहेका छन् । उनीहरुलाई अस्थायी प्रहरी पोष्ट थानाभर्याङगबाट खटिएको टोलीले पक्राउ गरेको हो । प्रहरीले उनीहरुको साथबाट लागुऔषध डाईजेपाम १६ एम्पुल, फेनरागन १६ एम्पुल, नुफिन १६ एम्पुल गरी ४८ एम्पुल बरामद गरेको छ ।

त्यस्तै, प्रहरीले हेटौंडा उपमहानगरपालिका वडा नं. १९ गुम्बाचोकबाट ५ किलो ४०० ग्राम लागूऔषध गाँजासहित एक जनालाई पक्राउ गरेको छ । पक्राउ पर्नेमा हेटौंडा–३ बसामाडी बस्ने ४२ वर्षीय लक्ष्मण बल रहेका छन् । शंकास्पद अबस्थामा देखिएका बललाई चेकजाँच गर्दा उक्त परिमाण्को गाँजा बरामद भएपछि उनलाई पक्राउ गरेको जनाइएको छ । पक्राउ परेका उनीहरुमाथि आवश्यक अनुसन्धान भइरहेको जिल्ला प्रहरी कार्यालय मकवानपुरले जनाएको छ ।