५५४९९ गणना गर्दा महेश बर्तौलाको अग्रता कायमै

हेटौंडा । प्रतिनिधिसभा मकवानपुर निर्वाचन क्षेत्र नम्वर–२ मा नेकपा एमालेका उम्मेदवार महेश बर्तौलाले अग्रता कायमै राखेका छन् ।

लोकतान्त्रिक बाम गठबन्धनका उम्मेदवार बनेका नेकपा एकीकृत समाजवादीका विरोध खतिवडाले बर्तौलालाई पछ्याइरहेका छन् ।

एमालेका बर्तौलाले १ हजार ६०७ मतको अग्रता बनाउँदा उनलाई उछिन्न खतिवडालाई हम्मेहम्मे पर्ने देखिएको छ । सुरुवात देखि नै पछि परेका खतिवडा बर्तौलालाई उछिन्न प्रयासरत रहेका छन् ।

कुल ५५ हजार ४९९ मत गणना गर्दा एमालेका बर्तौलाले २१ हजार ८४४ मत पाएका छन् । उनलाई एकीकृत समाजवादीका खतिवडाले २० हजार २६७ मतसहित पछ्याइरहेका छन् ।

त्यस्तै राष्ट्रिय स्वतन्त्र पार्टीका उम्मेदवार भरत पराजुलीले ७ हजार ७२० मत प्राप्त गरेका छन् ।

गत आइतबार सम्पन्न मतदानमा कुल ८६ हजार ६५२ मत खसेको मुख्य निर्वाचन अधिकृतको कार्यालय हेटौंडाले जनाएको छ ।