समानुपातिकतर्फ १५ प्रतिशत मात्रै मतगणना बाँकी

काठमाडौं । यही मंसिर ४ गते सम्पन्न प्रतिनिधि सभा सदस्य निर्वाचनअन्तर्गत समानुपातिक प्रणालीतर्फ अब १५ प्रतिशत मात्रै मत गन्न बाँकी रहेको छ ।

निर्वाचन आयोगको सूचना प्रणालीमा प्रविष्ट भएअनुसार प्रतिनिधि सभामा हालसम्म ९३ लाख ८ हजार १६४ अर्थात् खसेको मतको ८४ दशमलव ८२ प्रतिशत मतगणना सम्पन्न भइसकेको छ ।

निर्वाचनका लागि कूल मतदाता १ करोड ७९ लाख ८ हजार ८५० रहेकामा प्रारम्भिक विवरणमा ६१ प्रतिशत मत खसेको थियो । प्रतिनिधि सभाको प्रत्यक्षतर्फ १६५ स्थानमध्ये हालसम्म १५७ क्षेत्रको मतपरिणाम सार्वजनिक भइसकेको छ ।