मकवानपुरका दुईसहित तीन जना प्रहरीको फन्दामा

पर्सा । पर्साबाट प्रहरीले लागूऔषध चरेशसहित तीन जनालाई पक्राउ गरेको छ । प्रहरीले मकवानपुरका २ जना र पर्साका एक जना गरी तीन जनालाई लागूऔषध चरेशसहित पक्राउ गरेको हो ।

पक्राउ पर्नेहरुमा पर्साको पटेर्वासुगौली गाउँपालिका–५ का ६० वर्षीय प्रदेशी राउत (थारू), मकवानपुरको राक्सिराङ गाउँपालिका–८ का ३८ वर्षीय रमेश मोक्तान र मनहरी गाउँपालिका–६ का २५ वर्षीय रेशन मोक्तान रहेका छन् ।

उनीहरुलाई जिल्ला प्रहरी कार्यालय पर्सा र वडा प्रहरी कार्यालय श्रीपुरबाट खटिएको संयुक्त टोलीले पक्राउ गरेको हो ।

प्रहरीका अनुसार, पटेर्वासुगौली गाउँपालिका–५ देउरियामा परदेशी राउतको घर खानतलासी गर्दा चरेश ११८ केजी र अवैध लागुऔषध गाँजा ४ किलो बरामद भएपछि निजहरुलाई पक्राउ गरिएको हो ।

पक्राउ परेका उनीहरुमाथि आवश्यक अनुसन्धानका साथै कानूनी प्रकृया अगाडि बढाइएको जनाएको छ ।