ट्रेजरीमार्फत साढे २८ अर्ब आन्तरिक ऋण उठाउँदै सरकार

काठमाडौँ । सरकारले आगामी मंगलबार ट्रेजरी बिलमार्फत साढे २८ अर्ब रुपैयाँ आन्तरिक ऋण उठाउने भएको छ । केन्द्रीय बैंकले २८ दिने, ९१ दिने १८२ दिने र ३६४ दिने गरी चार किसिमको ट्रेजरीमार्फत उक्त ऋण उठाउने भएको हो ।

राष्ट्र बैंकका अनुसार, मंगलबार अर्थात् जेष्ठ ३० गते निष्कासन हुने २८ अर्ब ५० करोड रुपैयाँ बराबरको ट्रेजरी बिलको सोमबार अर्थात् जेष्ठ २९ गते सार्वजनिक बोलकबोल हुनेछ । mइचछुक लगानीकर्ता बैंक तथा वित्तीय संस्थाहरूले सोमबार दिउँसो ३ बजेसम्म ट्रेजरीका लागि आवेदन दिन सक्नेछन् ।

केन्द्रीय बैंकका अनुसार, कूल ट्रेजरी मध्ये २५ अर्ब रुपैयाँ पुरानै बराबरको पुरानो ट्रेजरी नवीकरण गरेर बाँकी रहेको ३ अर्ब ५० करोड रुपैयाँ नयाँ ट्रेजरी जारी गर्न लागिएको हो ।

कूल निष्कासन बिल मध्ये ८५ प्रतिशत प्रतिस्पर्धात्मक प्रणालीबाट र १५ प्रतिशत विना प्रतिस्पर्धाबाट बिक्री गरिने बैंकले जनाएको छ ।

यसअघि बैंकले जेष्ठ २२ गते ३० अर्ब ८७ करोड रुपैयाँ बराबरको ट्रेजरी बिक्री गरेको थियो ।