वीरगंजबाट पक्राउ परे हेटौंडाका स्याङ्तान

पर्सा । पर्साको वीरगंज महानगरपालिका–१६ स्थित सडकबाट नियन्त्रित लागूऔषध नाईट्राभेट १५ ट्याब्लेटसहित प्रहरीले हेटौंडाका एक जनालाई शुक्रबार पक्राउ गरेको छ ।

पक्राउ पर्नेमा मकवानपुरको हेटौंडा उपमहानगरपालिका वडा नम्वर १३ बस्ने ३२ वर्षीय वीरबहादुर स्याङतान रहेका छन् । उनलाई नेपाल प्रहरी तथा सशस्त्र प्रहरी बल समेतको संयुक्त टोलीले पक्राउ गरेको हो ।

प्रहरीका अनुसार, भारतको रक्सौलबाट वीरगंज बजारतर्फ आउँदै गरेको ना.३९ प २४५६ नम्वरको मोटरसाइकललाई रोकी चेकजाँच गर्ने क्रममा चालक स्याङतानको साथबाट उक्त परिमाणको लागूऔषधसहित फेला पारी पक्राउ गरेको हो । पक्राउ परेका उनीमाथि आवश्यक अनुसन्धान गरिरहेको जनाइएको छ ।