शक्तिशाली पासपोर्टहरुको सूचीमा नेपाल ९८ औँ स्थानमा
तु खबर संवाददाता
काठमाडौँ । नेपालको राहदानी (पासपोर्ट) ९८ औँ स्थानमा परेको छ । विश्वका शक्तिशाली पासपोर्टहरुको सूचीमा नेपाल १०३ देशमध्ये ९८ औं स्थानमा परेको हो ।
सबैभन्दा बढी मुलुकमा पाउने अन एराइभल भिसालाई आधार बनाएर ‘द हेन्ली पासपोर्ट इन्डेक्स’ले गरेको सर्वेक्षणमा विश्वका शक्तिशाली पासपोर्टको सूचीमा नेपाल ९८ औँ स्थानमा परेको हो ।
‘द हेन्ली पासपोर्ट इन्डेक्स’ले विश्वका सबैभन्दा शक्तिशाली तथा कम शक्तिशाली पासपोर्टको नामसहित सार्वजनिक गरेको प्रतिवेदनमा नेपालको पासपोर्ट ३८ वटा मुलुकमा मात्रै अनरआइभल भिसा लाग्छ ।
सूचीअनुसार सबैभन्दा कमजोर पासपोर्ट अफगानिस्तानको छ । सूचीको १०३ औं स्थानमा रहेको अफगानस्तानको पासपोर्टले २७ वटा मुलुकमा मात्रै अनअराइभल भिसा लाग्छ ।
त्यस्तै इराकको पासपोर्टले २९, सिरियाको पासपोर्टले ३०, पाकिस्तानको पासपोर्टले ३३, यमन र सोमालियाका पासपोर्टले ३५ स्थानमा अनअराइभल भिसा पाउँछन् । द्वन्द्वग्रस्त मुलुक प्यालेस्टाइनको पासपोर्ट र नेपालको पासपोर्टले भने ३८ मुलुकमा अनअराइभल भिसा पाउँछन् ।
त्यस्तै उत्तर कोरियाको पासपोर्टले ३९ मुलुकमा यस्तो भिसा पाउँछ । त्यसभन्दा पछि बंगलादेशले ४०, श्रीलंका र लिबियाले ४१ तथा कोसोभोले ४२ देशमा अनअराइभल भिसा पाउने जनाइएको छ ।
सबैभन्दा शक्तिशाली पासपोर्टको सूचीको पहिलो नम्वरमा सिंगापुर रहेको छ । त्यहाँको पासपोर्टले १९२ मुलुकमा अनअराइभल भिसा पाउँछ त्यस्तै क्रमशः जर्मनी, इटली र स्पेनले १९० मुलुकमा अनअराइभल भिसा पाउँछन् ।