रोल्पा बस दुर्घटना अपडेट : ४ जनाको मृत्यु
तु खबर संवाददाता२०८० श्रावण २३,मंगलवार १६:०७
रोल्पा । रोल्पामा बस दुर्घटना हुँदा ४ जनाको मृत्यु भएको छ । जिल्लाको त्रिवेणी गाउँपालिका–७ तिला रिचि गाउँ भन्ने ठाउँमा भएको दुर्घटनामा परेर चार जनाको मृत्यु भएको जिल्ला प्रहरी कार्यालय रोल्पाले जनाएको छ ।
मृत्यु हुनेहरुमा रोल्पाको माडी गाउँपालिका–२ बस्ने २१ वर्षीय प्रकाश बाँठा, माडी गाउँपालिका–४ का ५० वर्षीय गोर्खे डाँगी र उनकी ५० वर्षीया श्रीमती हस्त डाँगी तथा परिवर्तन गाउँपालिका–३ का ४६ वर्षीय भक्तबहादुर विक रहेका छन् ।
प्रहरीका अनुसार, परिवर्तन गाउँपालिका वाग्माराबाट दाङको घोराहीका लागि छुटेको ना ख २६१२ नम्बरको बस सडकबाट करिब १५० मिटर तल खसेर दुर्घटना भएको हो ।
उक्त दुर्घटनामा परेर अन्य १८ जना घाइते भएका छन् । उनीहरुलाई उपचारका लागि दाङ पठाइएको र घटनाको बारेमा आवश्यक अनुसन्धान भइरहेको जनाइएको छ ।
