मकवानपुर पहिरो अपडेट : बेपत्ता भएकामध्ये एक जनाको जीवितै उद्धार

मकवानपुर । मकवानपुरको बागमती गाउँपालिका वडा नं.५ सिक्रेदोभानमा पहिरोमा परी बेपत्ता भएकामध्ये एक जनाको जीवितै उद्धार गरिएको छ ।

सिन्धुली हरिहरपुर गाउँपालिका वडा नं. १ कोकटी बस्ने १७ बर्षीय पासाङ घिसिङको मंगलबार साँझ उद्धार गरिएको जिल्ला प्रहरी कार्यालय मकवानपुरका प्रवक्ता टेकबहादुर कार्कीले जानकारी दिए ।

प्रहरी नायव उपरीक्षक कार्कीका अनुसार, घिसिङलाई घटनास्थलदेखि करिब ७ किलोमिटर तल बागमती खोलाको किनारबाट उद्धार गरिएको हो । घिसिङको खुट्टामा समस्या देखिएको र हेटौंडा अस्पतालमा उपचार भइरहेको छ ।

पहिरोमा परी अझै ५ जना बेपत्ता भएका छन् । बेपत्ता हुनेहरुमा ६० वर्षीय अक्कलबहादुर स्याङ्तान, उनको छोरी २२ वर्षीया शिला पहरी, ज्वाई २५ वर्षीय जिबन पहरी, नाती ४ वर्षीय मिलन पहरी, नातिनी डेढ वर्षीय दिब्या पहरी रहेका छन् ।

प्रहरी र स्थानीयको सहयोगमा बेपत्ताहरूको खोजी कार्य भइरहेको उनले बताए । उनका अनुसार, पहिरोमा परेकामध्ये अक्कल बहादुरको श्रीमती ५५ वर्षीया सन्तमाया स्याङ्तानको उद्धार गरी स्थानीय मेडिकलमा लगिएकोमा उपचारको क्रममा मृत्यु भएको थियो ।