विशेष आन्तरिक अभियानमा कांग्रेस

मकवानपुर । नेपाली कांग्रेसले देशभर पार्टीको विशेष आन्तरिक अभियान सुरु गरेको छ । साउन २० गतेदेखि ३० गतेभित्र पार्टी विभिन्न एकाईं समितिको बैठक बस्ने गरी पार्टी चलायमान बनाउन विशेष आन्तरिक अभियान सुरु गरिएको हो ।

अभियानअन्तर्गत् साउन २० र २१ गते नेपाली कांग्रेस मकवानपुरको पूर्ण कार्यसमिति बैठक बसेर अभियान आरम्भ गरिसकिएको छ । बैठकले पार्टीको हितमा विभिन्न निर्णयसमेत गरेको जिल्ला सभापति बुद्ध लामाले जानकारी दिए ।

उनका अनुसार, साउन २३ र २४ गते मकवानपुर प्रतिनिधि सभा क्षेत्र–१ र २ एकाईंको बैठक बसेको थियो । सोही अभियान अन्तर्गत् साउन २५ र २६ गते मकवानपुर प्रदेश सभा, नगरपालिका र गाउँपालिका एकाईंहरु बैठक बस्नेछन् ।

यस्तै, साउन २७ र २८ गते मकवानपुर जिल्लाका सबै वडा एकाईं बैठक बस्नेछन् भने २९ गते नेपाली कांग्रेसबाट निर्वाचित जनप्रतिनिधिसँग बैठक हुनेछ । ३० गते जिल्लाका कार्यकर्ता भेला गरी अभियान समापन गरिने सभापति लामाले बताए ।