मकवानपुर प्रहरीद्वारा लागूऔषध गाँजासहित दुई जना पक्राउ

मकवानपुर । मकवानपुर प्रहरीले लागूऔषध गाँजासहित मंगलबार दुई जनालाई पक्राउ गरेको छ ।

प्रहरीले पुर्व–पश्चिम सडकखण्ड अन्तरगत पर्ने मकवानपुरको हेटौंडा उपमहानगरपालिका वडा नम्वर १५ रातोमाटे चेकपोस्टबाट लागूऔषध गाँजा ३ किलो ६०० ग्रामसहित दुई जनालाई पक्राउ गरेको हो ।

पक्राउ पर्नेहरुमा बाराको जितपुर सिमरा उपमहानगरपालिका–८ बस्ने वर्ष ५६ को सिबनाथ सहनि र वर्ष ४५ को मदन सहनी रहेको जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीले जानकारी दिए ।

प्रहरी नायव उपरीक्षक कार्कीका अनुसार, मंगलबार बिहान पौने ९ बजेको समयमा चितवनबाट वीरगंजतर्फ जाँदै गरेको बा ४ ख ५९३७ नम्वरको यात्रु बाहक मिनी बसलाई रोकी चेक जाँच गर्ने क्रममा उक्त बसमा सवार सबनाथ सहनीको साथबाट १ किलो ९०० ग्राम र मदन सहनीको साथ १ किलो ७०० ग्राम गाँजा बरामद भएपछि उनीहरुलाई पक्राउ गरिएको हो ।

उनीहरुलाई प्रहरी चौकी रातोमाटेबाट प्रहरी बरिष्ठ नायव निरीक्षक मञ्जु कुमारी रानाको कमाण्डमा खटिएको चेकिङ टोलीले पक्राउ गरेको हो । पक्राउ परेका उनीहरुमाथि आवश्यक अनुसन्धानका साथै कानूनी प्रकृया अगाडि बढाइएको जनाएको छ ।