एमाले बागमतीको नयाँ नेतृत्व चयनका लागि साढे ११ बजेदेखि मतदान हुने

काठमाडौं । नेकपा एमाले बागमती प्रदेश कमिटीको नयाँ नेतृत्व चयनका लागि आज बिहान साढे ११ बजेदेखि मतदान सुरु हुने भएको छ ।निर्वाचन कमिटीले अघिल्लो निर्वाचन कार्यतालिका संशोधन गर्दै नयाँ सार्वजनिक तालिका सार्वजनिक गरिएको हो ।

सार्वजनिक कार्यतालिका अनुसार, मतदान शुक्रबार बिहान ११ बजेदेखि साढे ५ बजेसम्म ६ घण्टासम्मका लागि समयसीमा तोकिएको छ ।

मतदानपश्चात् शुक्रबार नै मतपरिणाम घोषणा गर्ने तयारी गरेको प्रमुख निर्वाचन अधिकृत डिल्ली मैनालीले जनाएका छन् ।

एमाले बागमतीमा अध्यक्ष पदमा रामेछापका कैलाश ढुङ्गेल र मकवानपुरका कृष्णप्रसाद दाहालबीच प्रतिस्पर्धा हुँदैछ ।

त्यसैगरी, एक उपाध्यक्ष पदका लागि ईश्वरचन्द्र पोखरेल, दावा दोर्जे लामा, नारायणप्रसाद खतिवडा र राजेन्द्र राजथला गरी चार जनाबीच प्रतिस्पर्धा हुनेछन् ।

प्रदेश सचिवमा नवराज सिलवाल र हस्तबहादुर पण्डितबीच चुनाव हुने भएको छ । दुई उपसचिवका लागि १० जनाले प्रतिस्पर्धा गर्ने भएका छन् ।