७ वर्षीया बालिका बलात्कार गरेको आरोपमा पक्राउ

जनकपुरधाम । महोत्तरीमा ७ वर्षीया बालिकालाई बलात्कार गरेको आरोपमा प्रहरीले विद्यालय सञ्चालकलाई पक्राउ गरेको छ ।

पक्राउ पर्नेमा जिल्लाको गौशाला नगरपालिका ११ का ३३ वर्षीय जुगलकिशोर साह रहेको जिल्ला प्रहरी कार्यालय महोत्तरीले जनाएको छ ।

प्रहरीका अनुसार, पक्राउ परेका साह गौशाला नगरपालिका ५ मा सञ्चालित गौशाला एकेडेमीका सञ्चालक हुन् ।

ती बालिकालाई बिहीबार दिउँसो विद्यालयको चौथो तल्लामा लगी रुपैयाँको लोभ देखाई बलात्कार गरेको भनि परेको जाहेरीको आधारमा उनलाई शुक्रबार पक्राउ गरिएको प्रहरीले जनाएको छ ।

पक्राउ परेका साहमाथि जबरजस्ती करणी मुद्दामा जिल्ला अदालत महोत्तरीबाट ५ दिनको म्याद लिई आवश्यक अनुसन्धान गरिरहेको जनाइएको छ ।