पक्रन गएका प्रहरीमाथि चक्कु प्रहार, आरोपी फरार

धनगढी । दार्चुलामा श्रीमतीलाई कुटपिट गर्ने गरेको उजुरी पछि आरोपीलाई पक्रन गएका दुई प्रहरीमाथि चक्कु प्रहार भएको छ ।

महाकाली नगरपालिका–१ दहका २५ वर्षीय उमेश कुँवरले प्रहरीमाथि चक्कु प्रहार गरेका हुन् ।

आरोपित कुँवरको चक्कु प्रहारबाट दुई प्रहरी घाइते भएका छन् । घाइते हुनेहरुमा प्रहरी हवल्दार जयबहादुर खड्का र प्रहरी जवान डम्मरबहादुर ठगुन्ना रहेका छन् ।

प्रहरीका अनुसार, जवान ठगुन्नाको आँखाको तल्लो भागमा गहिरो चोट लागेको छ । घाइते उनीहरू दुवै सामुदायिक प्रहरी बाङ्गाबगरमा कार्यरत हुन् ।

आरोपित कुँवर भने चक्कु प्रहार गरेर फरार भएका छन् । उनको खोजीकार्य तीब्र रुपमा गर्नुका साथै घटनाको बारेमा आवश्यक अनुसन्धान भइरहेको जनाइएको छ ।