कञ्चनपुरबाट १४ वर्षीय बालक बेपत्ता

धनगढी । कञ्चनपुरको वाणीबाट एक जना बालक बेपत्ता भएका छन् । धनगढीको त्रिनगर माविमा कक्षा ८ मा अध्ययनरत १४ वर्षीय बालक ओमप्रकाश जोशी बेपत्ता भएको कञ्चनपुर प्रहरीले जनाएको छ ।

प्रहरीका अनुसार, आइतबार दिउँसो खाना खाएर ‘एकै छिनमा आउँछु’ भनेर घरबाट निस्केका उनी घर नफर्किएपछि आमा सावित्री जोशीले प्रहरी चौकी वाणी र जिल्ला प्रहरी कार्यालय कञ्चनपुरमा निवेदन दर्ता गराएकी हुन् ।

वाणी प्रहरीले दिउँसोको समयमा ओमप्रकाश साइकल हाइसमा राखेर महेन्द्रनगरतिर गएको सिसी क्यामेरामा देखिएको बताएको छ । उनको मोबाइल ट्रयाक गर्दा आइतबार बेलुकी दोधाराचाँदनी क्षेत्रमा देखिएको थियो ।

उक्त घटनाको बारेमा प्रहरीले आवश्यक अनुसन्धान गरिरहेको जनाइएको छ ।