ट्रकको ठक्करबाट कम्प्युटर अपरेटरको मृत्यु
तु खबर संवाददाता
विराटनगर । विराटनगरको बरगाछीमा आइतबार बिहान ट्रकको ठक्करबाट एक जनाको मृत्यु भएको छ । ट्रकको ठक्करबाट इलाका प्रशासन कार्यालयमा कार्यरत कम्प्युटर अपरेटरको मृत्यु भएको प्रहरीले जनाएको छ ।
मृत्यु हुनेमा सुनसरीको दुहबी नगरपालिका–९ का अन्दाजी २५ वर्षीय नगेनकुमार चौधरी रहेका छन् ।
विराटनगर महानगरपालिका–२ र ५ को सिमानामा उत्तरबाट दक्षिणतर्फ जाँदै गरेको बागमती प्रदेश ०३–००१ ख १४११ नम्बरको ट्रकले को ३६ प २८८९ नम्बरको स्कुटरलाई ठक्कर दिएको थियो ।
ट्रकको ठक्करबाट स्कुटर चालक चौधरी गम्भीर घाइते भएका थिए । घाइते उनको उपचारका लागि कोशी अस्पतालतर्फ लैजाने क्रममा बाटैमा मृत्यु भएको प्रहरीले जनाएको छ ।
दुर्घटना लगत्तै आक्रोशित बनेका स्थानीयले ट्रकमा आगजनी गरेका छन् । आगजनीबाट ट्रकको अगाडिको भाग पूर्ण रूपमा जलेको छ ।
दमकलको सहयोगमा प्रहरीले आगो नियन्त्रणमा लिएको थियो । आगजनीमा संलग्न भएको आशङ्कामा प्रहरीले २ जनालाई नियन्त्रणमा लिएको छ ।
प्रहरीले उक्त घटनाको बारेमा आवश्यक अनुसन्धान भइरहेको जनाएको छ ।