दुर्घटनामा परेर एक जनाको मृत्यु, एक घाइते

सुर्खेत । सुर्खेतको सिम्तामा आइतबार साँझ सवारी दुर्घटना हुँदा एक जनाको मृत्यु भएको छ भने अर्का एक जना घाइते भएका छन् ।

सल्यानको सल्लीबजारबाट सुर्खेतको गोजी बजारतर्फ जाँदै गरेको बा ९५ प ५२९६ नम्बरको मोटरसाइकल र विपरीत दिशाबाट आइरहेको भे १ त ४५ नम्बरको ट्याक्टर एकापसमा ठोक्किएर दुर्घटना हुँदा एक जनाको मृत्यु भएको हो ।

मृत्यु हुनेमा मोटरसाइकल सवार वीरेन्द्रनगर नगरपालिका–३, एरिचोकका २८ वर्षीय विजय राना रहेको प्रहरीले जनाएको छ । प्रहरीका अनुसार, दुर्घटनामा परेर विजयको घटनास्थलमै मृत्यु भएको हो ।

यस्तै, सोही दुर्घटनामा परेर अर्का एक जना गम्भीर घाइते भएका छन् । घाइते हुनेमा मोटरसाइकल चालक वीरेन्द्रनगर नगरपालिका–१, ढोडेखालीका २३ वर्षीय रुपेश गिरी रहेका छन् । उनको अवस्था गम्भीर रहेको र मेहलकुना अस्पतालमा उपचार भइरहेको जनाइएको छ ।

ट्याक्टर चालक र साहु भने फरार रहेको र घटनाको बारेमा प्रहरीले आवश्यक अनुसन्धान गरिरहेको छ ।