प्रधानमन्त्री प्रचण्ड आज हेटौंडा आउँदै

मकवानपुर । प्रधानमन्त्री पुष्पकमल दाहाल (प्रचण्ड) आज हेटौंडा आउने भएका छन् ।

प्रधानमन्त्री प्रचण्ड निर्माण व्यवसायी महासंघको २५ औँ वार्षिक साधारणसभामा सहभागी हुन हेटौंडा आउन लागेका हुन् ।

निर्माण व्यवसायी संघ मकवानपुरको सह–आयोजनामा आज चैत्र १६ गते र भोलि चैत्र १७ गते महासंघको वार्षिक साधारणसभा हुन लागेको हो ।

साधारणसभामा देशभरका ७७ जिल्ला शाखा, ७ प्रदेश, एसोसियट सदस्य तथा केन्द्रीय समिति तथा सल्लाहकारसहित करिब एक हजार ८ सय निर्माण व्यवसायी सहभागी हुने निर्माण व्यवसायी संघ मकवानपुर अध्यक्ष बालगोपाल कँडेलले जानकारी दिए ।

उनका अनुसार, साधारणसभा हेटौंडा–४ स्थित रोयल पार्टी प्यालेसमा हुनेछ ।

सभामा महासचिव र कोषाध्यक्षको प्रतिवेदन पेश हुनेछ भने साधारण सभास्थलमा निर्माण कम्पनीसँग सम्बन्धित २४ वटा स्टलहरु समेत रहने जनाइएको छ ।