मकवानपुरको बागमतीमा शिक्षक बैङ्क स्थापना गरिँदै

मकवानपुर । मकवानपुरको बागमती गाउँपालिकामा शिक्षक बैङ्क स्थापना गरिँदैछ । पालिकाले एक सूचना जारी गर्दै शिक्षक बैङ्क स्थापना गर्नेबारे जानकारी गराएको हो ।

पालिका शिक्षा समितिको गत चैत्र १७ गतेको निर्णय अनुसार “शिक्षक बैङ्क व्यवस्थापन कार्यविधि, २०८०” बमोजिम शिक्षक बैङ्क स्थापना गर्न लागिएको हो ।

शिक्षक बैङ्क अन्तर्गत शिक्षक प्रतिक्षा सूची रहने पालिकाका अध्यक्ष सर्केश घलानले जानकारी दिए ।

पालिका अन्तर्गत रहेका सामुदायिक विद्यालयमा कार्यरत शिक्षक लामो समय विदामा बस्दा विदा अवधिभर उक्त प्रतिक्षा सूचीमा सूचीकृत शिक्षकलाई खटाइने अध्यक्ष घलानले बताए ।

सूचनामा बालविकास केन्द्र सहजकर्ता, प्रावि, निमावि र मावि तहका लागि दरखास्त आह्वान गरिएको छ ।

बागमती गाउँपालिकामा ३५ प्रावि, १० निमावि र ५ माविसहित ५० वटा सामुदायिक विद्यालयहरू रहेका छन् ।