आज यी प्रदेशमा हल्का वर्षाको सम्भावना

काठमाडौं । मौसम पूर्वानुमान महाशाखाले आज देशको विभिन्न प्रदेशमा हल्का वर्षाको सम्भावना रहेको जनाएको छ ।

महाशाखाले कोशी प्रदेशको पहाडी भू–भागका थोरै स्थानहरूमा र बागमती, गण्डकी, कर्णाली प्रदेशको केही स्थानमा चट्याङ्ग र हावाहुरीसहित हल्का वर्षाको सम्भावना रहेको जनाएको हो ।

महाशाखाका अनुसार, हाल कोशी, बागमती, गण्डकी, कर्णाली र सुदूरपश्चिम प्रदेशको पहाडी भूभागमा आंशिक बदली रही बाँकी भू–भागमा मौसम मुख्यतया सफा रहने छ ।

साथै कोशी र गण्डकी प्रदेशको उच्च पहाडी तथा हिमाली भू–भागका थोरै स्थानहरूमा हल्का हिमपातको सम्भावना रहेको छ ।

नेपालमा स्थानीय वायु र पश्चिमी वायुको आंशिक प्रभाव रहेको र त्यसको प्रभावले कोशी र मधेस प्रदेशसहित देशका पहाडी भू–भागमा आंशिक बदली रहेको जनाइएको छ ।