हावाहुरीले १४ घरमा र दुई वटा मन्दिरमा क्षति

पोखरा । कास्कीको रुपा गाउँपालिकामा हावाहुरीले १४ वटा घर र दुई वटा मन्दिरहरुमा आंशिक क्षति पुर्याएको छ ।

जिल्लाको रुपा गाउँपालिका वडा नम्बर १ च्यार्पे बस्ने नरमाया गुरुङ, रुपा गाउँपालिका–२ छापडाँडा बस्ने सोमबहादुर खड्का, माझकोट बस्ने हर्कबहादुर गुरुङ, रुपा गाउँपालिका–६ जामुने बस्ने चिजामाया गुरुङ, कसिला गुरुङ, प्रतिक अधिकारी, गंगा गुरुङ, राज कुमार तामाङ लगायतको घरमा हावाहुरीले क्षति पुर्याएको प्रहरीले जनाएको छ ।

यस्तै, रुपा गाउँपालिका–६, मियागाउ बस्ने अब्बस अलि मिया, अबदुल मिया, रजिना मिया, मैमुन मिया, लैलातान मिया, कृष्ण बहादुर थापा, तसबिरन मिया र भिरचोक बस्ने जानकी गुरुङको घरमा पनि हावाहुरीले क्षति पुर्याएको छ ।

यसैगरी हावाहुरीले चिसापानीस्थित कोट मन्दिर र थापा गाउँको कुल मन्दिरका छाना पनि हुरीले उडाएको जनाइएको छ ।

कास्की प्रहरीका अनुसार, जेठ १७ गते बिहीबार साँझतिर हावाहुरीसहित वर्षा भएको थियो । हावाहुरीले मानवीय र चौपाया क्षति भने भएको छैन ।