कार दुर्घटना हुँदा एक जनाको मृत्यु

तु खबर संवाददाता
२०८१ असार १५,शुक्रबार ०९:२०

काठमाडौं । काठमाडौंको नागार्जुन नगरपालिका–६ रामकोटमा आज बिहानै कार दुर्घटना हुँदा एक जनाको मृत्यु भएको छ ।

दुर्घटनामा परेर नागार्जुन नगरपालिका–६ खरिबोटका पूर्ण दर्नालको मृत्यु भएको जिल्ला प्रहरी परिसर काठमाडौंले जनाएको छ ।

प्रहरीका अनुसार, बिहान करिब साढे २ बजे बागमती प्रदेश ०२७ च ०४९१ नम्बरको कार छमछमे खोलाको कलभर्टबाट तल खसेर दुर्घटना भएको थियो ।

दुर्घटना साढे २ बजे भएपनि बिहान साढे ५ बजेमात्र घटनास्थलबाट दर्नालको उद्धार भएको थियो । उनलाई उपचारका लागि मनमोहन मेमोरियल अस्पताल लगिएकोमा बिहान पौने ६ बजेतिर चिकित्सकले मृत घोषणा गरेको जनाइएको छ ।