वर्षाका कारण घर भत्किँदा एकै परिवारका ८ जना घाइते

सुर्खेत । जाजरकोटमा गएराति वर्षाका कारण घर भत्किँदा एकै परिवारका ८ जना घाइते भएका छन् ।

जिल्लाको छेडागाड नगरपालिका–१२ काडागाउँका स्थानीय पदम अधिकारीको घर भत्किँदा आठ जना घाइते भएको प्रहरीले जनाएको छ ।

प्रहरीका अनुसार, चार कोठा रहेको एक तले उक्त कच्ची घर भत्किँदा उनीहरु घाइते भएका हुन् ।

घर भत्किँदा घरधनी ३५ वर्षीय पदम अधिकारी, १० वर्षीय दिनेश अधिकारी, ३० वर्षीय सरिता अधिकारी, १४ वर्षीय नवीन अधिकारी, ६५ वर्षकी भिरकुली अधिकारी, १५ वर्षीय सुजता अधिकारी, १६ वर्षीय संगिता अधिकारी र १४ वर्षीय नवराज अधिकारी घाइते भएका हुन् ।

घाइतेमध्ये संगिता र नवराजको अवस्था सामान्य रहेको र उनीहरू घरमै रहेका छन् भने अन्यलाई उपचारका लागि जिल्ला अस्पताल जाजरकोट पठाएको जाजरकोट प्रहरीले जनाएको छ ।

उक्त घर भत्किँदा गोठमा बाँधी राखेका ३ वटा बाख्रा पुरिएर मृत्यु भएको जनाइएको छ ।