राक्सिराङका २३ विद्यार्थीलाई क्रान्तिकारीको सम्मान

मकवानपुर । अखिल नेपाल स्वतन्त्र विद्यार्थी युनियन (क्रान्तिकारी) र एकीकृत अखिल नेपाल शिक्षक सङ्गठन राक्सिराङ गाउँ कमिटीको संयुक्त आयोजनामा राक्सिराङ गाउँपालिकाका विभिन्न विद्यालयबाट २०८० मा एसईई उत्तीर्ण विद्यार्थीहरूलाई सम्मान गरिएको छ ।

राक्सिराङ गाउँपालिकाका विभिन्न विद्यालयबाट एसईई परीक्षामा सहभागी भई उत्कृष्ट नतिजा ल्याउने २३ जना विद्यार्थीलाई सम्मानित गरिएको हो ।

कार्यक्रम नेकपा माओवादी केन्द्रको केन्द्रीय सदस्य एवम् बागमती प्रदेश सभा सदस्य कुमारी मोक्तानको प्रमुख आतिथ्यतामा सम्पन्न भएको हो । सो क्रममा उनले समाज परिवर्तन र विकासको लागि शिक्षा महत्त्वपूर्ण भएको बताईन् ।

एकीकृत अखिल नेपाल शिक्षक सङ्गठन राक्सिराङ गाउँ कमिटी अध्यक्ष अशोक थिङको अध्यक्षतामा भएको कार्यक्रममा माओवादी केन्द्र मकवानपुरका जिल्ला संयोजक भीम पाख्रिन, सचिव वीरबहादुर घलान (ज्वाला), जिल्ला समन्वय समिति मकवुनपुरका प्रमुख एवम् अखिल क्रान्तिकारी फ्र्याक्सन इन्चार्ज ललित घलानलगायतको सहभागिता रहेको थियो ।