हेटौंडा–भीमफेदी हुँदै काठमाडौं जाने बाटो बन्द

मकवानपुर । हेटौंडा–भैंसे–भीमफेदी हुँदै काठमाडौं जाने बाटो पहिरोका कारण आज अपराह्नबाट बन्द भएको छ ।

मकवानपुरको भीमफेदी गाउँपालिका वडा नम्वर ४, रातोमाटेस्थित अपराह्न ४ बजे वर्षासँगै माथिबाट खसेको पहिरो गर्दा उक्त सडकखण्ड अवरुद्ध भएको जिल्ला प्रहरी कार्यालय मकवानपुरले जनाएको छ ।

बाटो अबरुद्ध भएसँगै काठमाडौंबाट हेटौंडा आउने र हेटौंडाबाट काठमाडौं जाने सवारीसाधन रोकिएको छ ।

सो पहिरो स्थानीय, प्रहरी, सडक डिभिजनका प्राविधिकले हटाउने प्रयास भइरहेको जनाइएको छ ।

त्यस्तै, पहिरोका कारण हेटौंडाबाट संघीय राजधानी काठमाडौं जोड्ने कान्तिलोकपथ सडकखण्ड पनि अवरुद्ध भएको छ । मकवानपुरको बकैया गाउँपालिका वडा ११, स्थित आँपचौर र लाम्राङमा पहिरो जाँदा शुक्रबार दिउँसो करिब २ः३५ बजेदेखि सडक अवरुद्ध भएको हो ।

उक्त पहिरो हटाउने प्रयास भइरहेको जनाइएको छ ।