मदन भण्डारी स्वास्थ्य विज्ञान प्रतिष्ठानको उपकुलपतिमा डा.ज्ञवाली
तु खबर संवाददाता
मकवानपुर । मदन भण्डारी स्वास्थ्य विज्ञान प्रतिष्ठान, बागमती हेटौंडाको उपकुलपतिमा डा.प्रदीप ज्ञवाली नियुक्त भएका छन् ।
बुधबार बसेको मन्त्रिपरिषद् बैठकले डा. ज्ञवालीलाई प्रतिष्ठानको उपकुलपतिमा नियुक्त गर्ने निर्णय गरेको हो । डा. ज्ञवाली ४ वर्षे कार्यकालका लागि उपकुलपतिमा नियुक्त भएका हुन् ।
पाल्पा घर भएका उनलाई सामाजिक विकास मन्त्री हरिप्रभा खड्गीको सिफारिस र स्वास्थ्य मन्त्री किरण थापाको सहमतिमा मन्त्रिपरिषद् बैठकले उपकुलपतिमा नियुक्त गरेको जनाइएको छ ।
गत साउन १५ गतेदेखि रिक्त उक्त पदमा प्रदेश सरकारले २ महिना पछि डा.ज्ञवालीलाई नियुक्त गरेको हो ।
डा. ज्ञवालीले त्रिभुवन विश्वविद्यालय अन्तर्गतको इन्स्टिच्युट अफ मेडिसिन क्लिनिकल फर्माकोलोजिमा मास्टर्स गरेका छन् । डा.ज्ञवाली महाराजगन्ज मेडिकल क्याम्पस एशोसियट प्रोफेसर हुन् ।
टिचिङ अस्पताल अन्तर्गतको सो क्याम्पसको अनुसन्धान शाखाको प्रमुख समेत रहेका उनी नेपाल स्वास्थ्य अनुसन्धान परिषद्को सदस्य सचिव समेत भएर काम गरिसकेका छन् ।